Kooxaha xadgudbay ee fasaadka wada kuna gambanaya magaca diinta, gaalaysiinaya dadka muslimiinta ah, marwalba marmarsiyo cusub ma waayaan.

Dad badan baa islahaa waa mujaahidiin Allah dartii u dagaalamaya, danta kaliya oo ay leeyihiin waa in cadowgu baxo, Allah mahadii cadowgii waa baxay, dagaalkiina waa sii wadeen, ayaga oo marmarsiyo ka dhiganaya waa in diinta Islaamka lagu xukumaa dalka, Sh Shariif waa ku dhawaaqay in shareecda Islaamka la isku xukumayo.

Shalay oo ay taariikhdu ahayd 10maarso,2009ka, golaha wasiirada ayaa isla gartay in shareecada Islaamka la isku xukumo, insha allah baarlamaankuna dhinacooda ayay ka ansixin doonaan.

Suaashu waa, kooxaha muqaawamada sheegta hubka ma dhigi doonaan maadaama la ogolaaday arimihii ay marmarsiyaha ka dhigan jireen, dhiiga muslimiintana ku baneesan jireen?    jawaabtu waa maya maya maya.

Qof walba oo garanaya kooxahaan aan marmarsiyahooda dhamaanayn, meesha ay salka ku hayaan iyo faraca ay ka soo jeedaan, jawaabtaas oo kale buu helayaa, waxaana usoo baxaysa Dowlada Sh Shariif xataa haday malaaig noqdaan xabada laga dhaafi mayo, marmarsiyo lagu gaalaysiiyo dhiigoodana lagu baneestana la weyn mayo.

Faracooda iyo meesha ay ka soo jeedaan ayaa keensanaysa in aan la qancin karin, waxay ka soo jeedaan ragii Saxaabada rasuulka SCW gaalaysiiyay, oo dilay Cali Bin abii Daalib Allah haka raali noqdee, wiliba midkii dilay uu u arkayay in uu janada ku galayo.

 Cali oo fadligiisa aan la soo koobi karin, ayna ku filan tahay in janada loogu bishaareeyay ayaan ka badbaadin, marmarsiyaha ay saxaabada kula dagaaleen ayay maantana dadka kula dagaalaan, oo ay kamid tahay isku xukunka shareecada Islaamka.

Walaalayaal haku sirminina isku xukunka shareecada Islaamka oo ay la qaylinayaan, waa hadal sax ah oo ay baadil ka hoos wataan, kuwa ay ku abtirsadaana saas ayay ula qaylin jireen isku xukumka shareecada Islaamka.

Aabaha ay ku abtirsadaan ayaa Rasuulka SCW cadaalad xumo ku sifeeyay.

Ragu waa ragaas, 100% hadii diinta loo qaatana laga badbaadi mayo, Dowlada cusubna goaan kasta oo wanaagsan oo ay qaadato soo dhaweyn mayaan, irid fitno markii la xiro mid kale ayay furayaan. Allah shartooda umada haka qabto.

Cumar Wehliye.   cumarwehliye@gmail.com

Miisaanka.com    Email: miisaanka@gmail.com