Waaxda iclaamka ee Al-Shabaab ayaa dhameystirtay isku aadinta iyo tarjumida Codad uu leeyahay Sh Xasan Daahir Aweys, kuwaasoo xambaarsan hadalo uu Sh Aweys ku sheegayo in halganka uu wado uu ku saleysan yahay xukun raadis, Madaxweynihii hore ee Cabdullahi Yuusufna ay isku hayeen xukun oo uusan khilaafkoodu la xiriirin wax diin ah.

Sidoo kale Codadkan ayaa xambaarsan hadalo uu Sh Aweys ku mucaaraday howlgalo ay fuliyeen Shabaabka gaar ahaan duulaamadii ay ku qaadeen Guriceel iyo Gobolada Dhexe intii aysan soo muuqan kooxda Ahlu Sunna iyo hadalo kale oo iska hor-imaanaya ama is-burinaya.

Xogtan ay Shabaabku ka diyaariyeen Sh Aweys ayay noo xaqiijiyeen ilo muhiim ah oo lagu kalsoon yahay, waxeyna sheegeen in hadalada Sh Aweys loo tarjumay  af-carabi, si fiicana looga shaqeeyay loona gudbiyay Hogaanka sare ee Al-qaacida si ay talo uga bixiyaan.

Xogtan ayaa tilmaameysa in Shabaabku ay shaacin doonaan cajalka ay diyaarsheen isla markaana ay Hogaanka sare ee Al-qaacida ka dalban doonaan Fatwo hadii Sh Aweys raaco Dowlada Sh Shariif ama uu u weecdo dadaalada dowliga ah ee ku wajahan Soomaaliya.

Waaxda iclaamka ee Shabaabka ayaa xog sidatan oo kale ah oo ay ku jiraan hadalo is-burinaya horay uga diyaariyay Madaxweyne Sh Shariif kadibna banaanka u soo saaray markii Madaxweynuhu ka weecday wadadii Shabaabku rabeen, taasoo ugu dambeyntii loo helay fatwo ka timid Usaama Bin Laadin oo gaalaysiisay Madaxweynaha, amartayna in lala dagaalamo.

Sh Aweys ayaan wili qaadan go'aan kama dambeys ah oo uu ku kala dooranayo Shabaabka iyo Dowlada, waase lagu wargaliyay Codadka ay Shabaabku diyaarsheen iyo dhibka uga imaan kara.

Shabaabka ayaa macluumaad badan ka keydiyay Madaxdii ay ku wada jireen Midowga Maxaakimta, Macluumaadkaas oo loo adeegsanayo dagaalka Mediyaha xiliga Masaalixdu iska hortrimaado.