Al-Shabaab ayaa isugu soo aruuray Magaalada Marka, kadib markii laga soo saaray Bay Iyo Bakool iyo Kismaayaba, madaxda ururka ayaa xalay waagu ugu baryay shir looga hadlayay masiirka Abuu Mansuur iyo mustaqbalka mugdiyoobay ee xarakada.

Go´aamada shirka ka soo baxay ayaa wili si rasmi ah saxaafada loo gudbin, waxaase la filayaa in Abuu Mansuur laga qaado Afhayeenimada xarakada, murtadnimana lagu xukumo.

Shirka ka hor ayaa waxaa magaalada laga saaray shabaabkii ku abtirsan jiray beelaha Biyomaal iyo Digil iyo Mirifle, taas oo looga aarsanayay Abuu Mansuur oo horay uga soo sifeeyay Bay iyo Bakoolka shabaabka aan ku abtirsan Digil iyo mirifle.

Warar ay heshay shabakada miisaanka ayaa tibaaxaya in Amiirka Shabaabka Axmed Godane uu damacsanyahay in uu badalo istraatiijiyada xarakada, soona celiyo xiriirkii xumaaday ee ay la lahaayeen Beesha Hawiye si loo badbaadiyo jiritaanka xarakada loona waajaho Abuu Mansuur.

Sidoo kale dhalinyaradii shabaabka ee ka soo jeeda Beesha Hawiye ayaa goobjoog ka ahaa madasha shirka waxaana horkacayay nin magiciisa na loogu sheegay Xasan Afrax.

Dhamaan Ajaanibtii ku hoos noolayd Al-Shabaab ayaa ku sugan Marka, waxaana hormuud u ah nin Maraykan ah oo asna la sheegay in uu madasha shirka goobjoog ka ahaa, kana mid yahay raga ay taladu ka go´do.

Sidii ay u dhalatay Dowlada Sh Shariif madaxda ka yahay, nabadana loo helay ayaa maalinba maalinta ka dambeysa waxaa sii baaba`ayay qoraxdooduna sii dhacaysay kooxaha mufsidiinta ah.

Cali Sahal: alisahal778@gmail.com

miisaanka.com